Sendin, tierra de musiqueiros. Sábado de Pascoa yá ben sendo moda fazer l ancontro de musiqueiros an Sendin, ua fiesta que tubo ampeço an 2005 i que todos ls anhos se ten mantenido.
Cul ajuntadouro de musiqueiros que esta tierra ten capacidade de fabricar, cuido que serie buono fazer, alguien que antenda de l assunto, un studo subre las tendéncias musicales de las personas i saber l porquei de haber esta bena artística an Sendin. L cierto ye que l mais de las tierras, ampeçando por las bezinas, nun hai registros de algo assi. Que la música mos cuorre na sangre nun hai dúbedas, por esso deixo-bos algues retratos deste anho, tirados por Nuno Santiago i Cecílio i que stan mui buonos.
