Ls retratos de hoije traien sauidades a muita giente i inda mais als que ténen familia loinje.
You sei que alhá loinje béien l SAL i lhembran-se de Sendin i de nós.
L Pe. Mourinho screbiu un soneto an sindenés .
Bou a screbir-lo eiqui, mas cun algues çfrencias ne ls acentos yá que l miu cumputador nun ls deixa poner.
Nesse soneto el quier lhembrar ls que murrírun i todos ls que ándan pul mundo fuora.
Ls retratos son tamien para eilhes i para ls que acá stamos pensarmos.
L niu de ciguonha na calçada
Las paredes dels prados
Todo mos mostra cumo era dantes, quantos bírun la ciguonha i fúrun para ls prados cun las mulas ou a paixaros. Las paredes que habie que saltar atrás de las canhas na fiesta de San Sebastian.
Ls caminos chenos de lama.
I hoije cumo ye la rue de San Sebastian? L tiempo faç mudar todo i nun anda para trás, mas nun podemos parar.
La rue de San Sebastian
I agora l soneto em sendinés:
SAUIDADES
Yâu chamo quin nun bâio i bin cunheço,
Mas longe mora...-para alhá del mar...
Yâu chamo, i a chamá-lo desfaleço,
...Naide arresponde, quedo-m´a chorar.
A Dius que yí mìu Pai, tóls dis âufreço
Las flores d´âuraciâun q´ando a rezar,
Pur essas almas brancas que nun m´reço,
Pur bós rosas d´Abreil simpre a brilhar.
I bós, pur longes tirras trabalhando,
Els dis passais tamin reindo i chorando
Lhembrâncias i canteiyas que passórun...
Mas meiro i bâio al pí del bússo níu
Só planto i ais d´amor pur quin fugiu...
- Chórã ls que se feurun, chórã ls que quedórun!...
