Fui a ber l lagar de azeite i yá corrie l azeite nuobo. Gustaba de bos mostrar un lagar de ls antigos i la prensa, mas eiqui nun ye l lugar mais apropiado, porque nun tengo spácio para poner todo.
Mas bou a ber l melhor modo. Para muitos puode nun ser anteressante, mas para outros serie bien.
La compratiba de l azeite ten hoije un lagar moderno i ye esso que bos bou a mostrar.
A çcargar la azeituna
Sin parar i zde que se çcarga, la azeituna passa por bários sítios até salir l azeite. Ne l retrato a seguir podeis ber cumo la azeituna bai para ls smagalhadores.
L trabalho i l tiempo que se gasta ye menos que antes. Mas nun hai quaije naide que nun fale nas torradas. Quando cheguei alhá, lougo me preguntórun pul pan para fazer la torrada.
Este ye un de ls maiores colheiteiros
Stában bários colheiteiros i todos quedórun cuntentos an ber l Hoije , ye que you lebaba la máquina de tirar ls retratos na mano. I yá bai sendo uso dezíren:
- Yá ben la anternete, manhana yá aparécen ls retratos.
Mas la critica nunca falta.
- Sin torradas nun bai a quedar bien.
- Bou a ber se yá cuorre l azeite para las fazer.
I yá corrie i l lagareiro lougo se puso pronto para l retrato.
L lagareiro i l azeite a correr
Cumo nun lebaba l pan fui a fazer la torrada an casa.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
