Este ten sido un anho de muita falta d’auga. Parece que nun quier chuber, mas friu ye l que mais faç. Hai nubrina pula manhana i las giladas son grandes. Stá buono para matar l cuchino i curar l fumeiro.
Mas l que me fizo pensar hoije, fui la falta d’auga i pensei cumo serie datrás, nun anho cumo este, an que andában ls molinos i estes éran solo l que habie para moler l pan. Sin auga starien parados.
L que sobra dun molino nas Lagas
Sin farina i sin pan, la fame serie cierta. Sendin tenie muita giente por esso ls molinos éran muitos i quaije todas las ribeiras ls tenien. Mas la de Sendin era la que tenie mais.
Este tenie ua presa bien grande
Ls sendineses éran mais listos que muitos hoije an die. Yá fazien presas para guardar l'auga. Mas ye ua pena nun recostruir pul menos un molino.
Las poucas piedras que nun lebórun
Tengo saudades de ber un molino a andar. Stou a fazer la recuolha de ls nomes de todas las pieças que fazien parte de l molino. Miu pai fui molineiro i por esso le chamában tiu Chico Molineiro.
Cumo se chamaba esta parte?
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
