Ne l die de Santa Luzie dízen ls sendineses:
«El die de Santa Luzie,
Minga la núite
I crece el die!...».
(Cancioneiro Tradicional e Danças Populares Mirandesas – António Maria Mourinho)
Stou a poner l telhado a ua cozina i l home que faç la obra ye de Vilar Seco .
L home a trabalhar
Cumo Vilar Seco ye ua de las aldés de Vimioso , onde se fala l mirandés, aporbeitei para falar un rato cul home, nun solo para ber se inda falaba l mirandés, mas para ber se habie çfréncias cun la nuossa fala.
Quedei ademirado, pus sabie falar bien i dixo-me que coincie muito subre la léngua mirandesa, ls libros que habie i las çfrencias de la fala nas bárias tierras.
Ua casa antiga de Vilar Seco
Ye pena nun tener un jornal para screbir toda la cumbersa, mas tengo-la registrada para ir screbindo noutros dies.
Quien me lembrou que die era hoije, fui el, i fizo-me ber que ne l Praino ls dies ampéçan a crecer hoije i nó cumo se diç, que l die mais pequeinho ye l die 21 . L die mais pequeinho ye l die antes de Santa Luzie.
Tamien me falou que era hoije que se ampeçában a cuntar las cabanholas .
Quien quejir saber l que son las cabanholas debe ir a ber la nuoba de l die 9 de Outubre i queda a saber tamien l tiempo que bai a fazer, an qualquiera parte, na semana seguiente.
La fuonte de l lugar de Vilar Seco
Para quien nun saba, falei de Vilar Seco prque l mirandés nun se fala solo ne l cunceilho de Miranda, mas an outras aldés de l Praino. I cumo me dezie l home de Vilar Seco , l mirandés fala-se mais que muitos cúidan. El, que faç obras por todo l Praino, dixo-me que antre pessonas coincidas i que sáben l mirandés, mesmo sin querer, fálan siempre an mirandés.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
