Hoije fui a ua matáncia a la moda antiga. Inda se fázen an algues casas de l Praino. Solo la muorte de l cochino ye que bai sendo çfrente, yá que nun se puode matar l cochino an casa ou sin ser bisto, apuis de muorto, pul beternairo.
Quin quejir ber ls retratos, de cumo se matou l cochino, ten que ir a ber ne l sitio de ls retratos.
Eiqui bou a dar-bos a coincer la matáncia ne l que toca al comido.
L desaiuno
Lougo por la manhana, la família ajunta-se na casa de l duonho de l cochino que se bai a matar i cómen-se ls figos secos, las nozes i bebe-se ua copa de augardiente, anquanto se ban ajuntando todos.
Mata-se l cochino i anquanto las mulheres lában las tripas i la duonha porpara l almuorço, ls homes arríman todo i dan dous dedos de cumbersa.
Las sopas
Las sopas de la matáncia ye la purmeira cousa que se come. A seguir bénen ls garrotes assados i apuis ben l cozido a la moda de l Praino.
Ls garrotes a assar
Nun bou a splicar todo, mas cumo se questuma dezir, un retrato bal tanto ou mais que mil palabras.
La giente a la mesa i l cozido bien a la bista
Para acumpanhar todo l comer nun puóden faltar las azeitunas curadas, ls pomientos i las guindilhas de l binagre.
Las azeitunas i ls pomientos de l binagre
Toda la giente faç por comer de todo, yá que hai que saber se todo stá buono. Ne l fin bénen, la fruita i ls doces regionales i nun fáltan las ubas que se guardórun an colgadeiros para esta altura i para l Natal i Anho Nuobo.
La família i ls amigos a comer
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
