Purmanhana, la gelada era mui grande. Iba a dar de comer al perro, éran las uito i yá ls homes ampeçában a trabalhar ne l cabanhal, que ando a fazer para meter ls rachones para l lume.
Cumo bos dixe soutro die, l’ancargado de la obra ye de Vilar Seco.
Cumo la gelada era tan grande, tirei un retrato a las berças, cuitadicas, stában smirradicas.
Las berças geladas
Quando tiraba l retrato, l filho de l ancargado iba a agarrar ua piedra i diç:
- Ah pai, la piedra stá colada!
Nesto, l pai de l moço bira-se para mi i pergunta:
- Ah tiu Almendra, bos dezis que sabeis todo, mas nun sabeis esta?
- Dezi alhá, puode ser que saba.
- Bou-bos-la a cuntar…
« Un spanhol, desses que cúidan que son mais que nós, fui-se a tener cun miu pariente que andaba a guardar l ganado, nun die cumo l d’hoije i quando nesto, ls perros botórun-se a dreitos a el. El bai a agarrar ua piedra para atirar als perros i acunteciu-le cumo al miu filho. La piedra staba colada, fui a agarrar outra, eigual. La suorte del fui Carbalhino chamar puls perros. Mas l spanhol, todo anraibado gritou:
- Los mirandeses, no son cumo los demás, prenden las piedras y dejan sueltos los perros.
Fui apuis a tirar ls retratos a las mulhieres que stában a anchir, para bos mostrar todo, mas yá nun tengo muito çpácio, por esso, solo bos mostro las ties a anchir ls bulhos .
Las ties a anchir ls bulhos
Quando se faç l fumeiro ls homes pícan ls uossos i tamien átan ls bulhos quando son grandes cumo este.
Que bulho!...
L home a atar un bulho
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
