Yá neba an Sendin i ye niebe buraqueira. Ye ua niebe mui fina i gelada que entra nas casas mesmo por ua frincha. Puode ser que nun seia muito tiempo a nebar deste modo, puis inda me lembra de l que acunteciu hai por ende 40 anhos, la niebe antrou por todos ls lados i la giente tubo muito trabalho para la tirar de ls terceiros.
L cruzeiro de Camino Prado hoije purmanhana
Cumo me lembrei de la niebe buraqueira, fui a ber se tenie un retrato desse tiempo, nun l achei, mas achei este que me dou ua buona eideia.
Haberá melhor postal que este?
BUN NATAL
FELIÇ ANHO NUOBO
Ye l retrato de ls garotos nun die de niebe, nas eiras de Sendin, hai 25 anhos, inda nun habie nada costruido delantre de l Asilo. Eiqui era onde stan hoije, l Centro de Salude, la Scuola anfantil, l Lar de ls bielhos, ls Bumbeiros i la casa de la Junta de Freguesie.
E este ye un retrato de Sendin, a la nuitica, nun die de niebe cumo l de hoije.
Sendin tamien ten ancanto
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
