Mais un jogo de l campeonato strital de futebol de la A. F. BRAGANÇA , an Sendin.
L die staba de sol i sin aire, mas fazie un friu de rachar.
L jogo fui antre dues eiquipas que yá stubírun na 3ª. Divisão Nacional , l Sendin i l Rebordelo i por esso fui un jogo mui animado i an que las dues eiquipas querien ganhar. L Rebordelo anté ls 15 minutos atacou mais, yá que l Sendin parcie algo nerboso, mas la claque de l Sendin mostrou la sue fuorça i fizo animar ls jogadores.
La giente na bancada
L Sendin animado ampeçou a eiquelibrar l jogo i no fin de la purmeira parte yá dominaba l jogo, mas l resultado era 0-0.
La segunda parte fui eiquelibrada i l jogo fazie-se mais no meio de l campo.
L Sendin cun la bola
Mas la giente nun paraba de gritar para que l Sendin marcasse un golo i parece que dou resultado i ls jogadores alhá metírun un golo.
L Rebordelo inda tentou ampatar, mas l friu iba-los arrefecendo anquanto l Sendin cula calor de la giente aguantou bien i podie tener marcado mais un ou dous golos.
L Rebordelo a tentar tomar cuonta de l jogo
No fin ls sendineses quedórun mais cuntentos porque ganhórun.
Sendin – 1
Rebordelo – 0
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
