Abriu hoije la sposiçon de la seda na Casa de la Cultura. Alhi se puode ber cumo se tíran ls filos de seda de ls capielhos de l bicho de la seda.
Anabela Nobre ye la ancarregada de la sposiçon que fui feita por la “ Associação para o Estudo, Defesa e Promoção do Artesanato de Freixo de Espada à Cinta ” i tubo l apoio de la Junta de Freguesie.
Anabela Nobre i las animadoras de la AEDPA
La seda ye tirada de ls capielhos de l bicho de la seda. Estes son metidos nua caldeira cun auga a ferber i apuis cun un ramico de carqueija dá-se ua mexidela ne ls capielhos até que ampece a aparcer l filo de seda. Quando sálen ls filos prénden-se a la debanadeira.
Ls capielhos
Nun bou eiqui a dezir todos ls trabalhos até chegar als artimanhos que se puóden fazer cun la seda, yá que tenie muito que screbir i este ye un spácio solo para dar las nuobas. Mas mostro-bos l retrato de bários panhos de seda, que se puóden ber na sposiçon.
Ls panhos de seda
An Sendin houbo tamien quien fazisse seda, mas de modo mui artesanal. You oubi falar desso, puis habie moreiras cerca de ls molinos de las lagas i dezien que las fuolhas éran para l bicho de la seda.
Habie moreiras tamien a la borda de la strada i inda hoije hai ua ne l adro de la eigreija.
De l filo de la seda, an Sendin, fazien l sedal para la pesca ne l riu.
Las artesanas a tirar ls filos de seda
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
