Hoije amarrei a la cama. La gripe parece que antrou comigo onte a la tarde, inda fui a Miranda al doutor, comprei ls remédios na framácia i ampecei lougo a tomá-los. Agora nun mos podemos çcuidar, que yá nun tenemos l drº. Raposo para ir a casa de nuite se fur perciso.
Na farmácia habie bastante giente i lougo me dezírun que era andaço.
Na cama stube bien atafanhado até a la tarde, cuidaba que yá nun podie fazer l hoije.
Alebantei-me un pouco i mirei pal semitério, del quarto bei-se bien, mas nun pensei na muorte, que essa ben quando eilha quier. Dei cunta, ye que l die yá bai sendo maior.
L die para ls lados del semitério
Esto lembrou-me l dito de toda la bida:
-Pul Natal, l die ten un salto de pardal
Fui a mirar a la jinela que dá para la Trindade i era mesmo berdade l die yá era maior.
L retrato para ls lados de la Trindade
La mie tie lougo ampeçou a renher, que debie ir para la cama, mais esto, mais aqueilho, mas l hoije tenie que l fazer.
Eilha naciu no Baiunco i tamien sabe la nuossa léngua i a las bezes lembra-me palabras i frases, que you yá iba squecendo.
-Stou malo, mas nun ye de morrer.
-Finta-te, apuis nun te me queixes.
L antardecer para ls lados de la eigreija
Yá stában las luzes acesas, mas l Sol parcie dezir que inda ye el que manda.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
