Ne l die de Natal, por la tarde, no sagrado, ajunta-se siempre giente a falar.
You ye ralo ir para lhá, mas l hoije tenie que ir. Habie muitos sendineses que bénen ne l Natal i hai siempre nuobas.
L hoije yá ye tamien cumbersa de l Sagrado.
Lembrais-bos de l die 12 deste més? LS MOLINOS .
Ye andrento que stan ls buracos de que bos preguntei l nome
Tiu Jape staba ne l Sagrado i cumo molineiro de l molino que bos mostrei, perguntei-le cumo se chamaba aqueilho.
-L nome agora nun sei, mas era por donde salie la auga que fazie andar las piedras. Son dous porque fui l purmeiro molino a tener dues piedras de moler.
Tamien fui l purmeiro a tener piedras francesas.
Ua piedra cun la anscriçon an francés
- Un die destes bamos a falar desso todo.
- Buosso pai tamien sabie cumo era i bós sei que sabeis, puls dous bien poderiemos ajudar a recostruir l molino i nun custaba muito.
- Mas tenie que ser de l pobo. Mas hoije nun ye die desso.
- Na ribeira habie 17 molinos até San Paulo i ua azenha.
L termo de Sendim onde se puode ber la ribeira toda
Hai quien tenga dúbidas, se la capielha de San Paulo ye de Sendin ou de Picuote. Pus ende stá la marcaçon de ls termos. La capielha ye ne l termo de Sendin. Ne l mapa, al meio, de lado dreito, stá bien a la mostra que queda para cá de la marcaçon.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
