Algues bezes scribo uas palabras menos coincidas i que ténen ua ou dues maneiras de se dezíren an mirandês. You scribo siempre cumo las oubi an Sendin. Ls lenguistas ye que dében dezir qual ye la mais cierta. Amadeu Ferreira ye un doutor an mirandés i hai que le dar l sou balor, mas nesta parte de la morfologie de las palabras, poucos sáben que ye l filho del, José Pedro Cardona Fereira, que cumo lenguista, mais ten studado las palabras mirandesas. Fazer un dicionairo ye cumo fazer ua barraige i eilhes yá l líeban feito. Para eilhes, un muito oubrigado de l hoije .
Bino esto a porpósito de la nuoba d’hoije.
Hoije l die amanheciu cun ua nubrina mui grande, tal qual cumo onte.
Abenida de l Ciclo
Quando hai nubrina i la tempratura ye mui baixa, ls galhos de las arboles i las redes, quédan, brancas porque la áuga de la nubrina gela i agarra-se a eilhas parcendo niebe. Esto nun ye gelada, chama-se cenceilho (hai quien diga cenceinho ), an pertués (sincelo). Ende stá la rezon de l que falei al percípio.
L cenceilho nas arboles
L cenceinho nua rede
Outra palabra ye ua que ten a ber cul die tamien. Stamos ne ls dies de las cuontas para ber l tiempo que bai a fazer durante l anho. You stou a tomar cuonta i por esso tirei l retrato para ber cumo staba l die i ber se las cabanholas dan cierto. Ende stá outra palabra, cabanholas (hai quien diga cabanhuolas ). Mas cabanhuolas son cabanhas tamien.
Camino Prado caras al Sagrado
Será cabanhuolas porque éran ls pastores que nas sues cabanhas fazien las cuontas?
Outra palabra que ten çfrencia, cuonta (conta) i cunta (stória).
Cumo bedes la nuossa léngua tamien ye cumo las outras, ten la sue morfologie propia, ten bida.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
