Nun era mui defícel de adbinar onde era l poço, mas siempre houbo quien nun soubisse i cumo hai siempre algo mais para splicar, bengo hoije a falar outra beç nesso.
L poço queda ne l curral onde ls Cardosos tenien las bacas, por trás de la casa que era de tiu Rechas i que hoije ye de Jape.
Alhi habie un forno que era outilizado por muita giente i era un curral onde habie dues pilas grandes, que éran para dar de bober a las bacas.
La casa de tiu Rechas bista de frente
Essas pilas, yá éran mui antigas i siempre oubi dezir als bielhos, hai mais de 30 anhos que yá éran outelizadas puls judius para tratáren las pieles.
Ls judius fúrun perseguidos pula Anquesiçon durante muitos anhos i muitos judius sendineses morrírun.
La parte de trás de casa de tiu Rechas
Nun ye eiqui l sitio próprio nin hai muito spácio para screbir subre esso todo, mas queda cumo un alerta para quien querga studar essas cousas.
La AZATS puode ser ua Associaçon, que se todos quejirmos poderá fazer muito por la stória de Sendin i ancentibar l turismo.
La casa de Jape
La casa fui bien recuperada i queda bien.
Era ua casa senhorial i hai mesmo quien diga que fui sitio de reunion de ls judius (sinagoga?). Ls nuobos ténen muito por onde studar, you poderei ajudar cun l pouco que soubir.
Para ls que nun son de Sendin i quejírun ber l poço ye perguntar por la rue de l Canzielho i queda a la mano squierda de quien bai de l percípio de la rue.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
