Yá que stamos cun esto de l poço, pus bamos a falar de ls currales i queda la cousa mais ou menos sclarecida.
Quando traigo estas cousas ye para que se beia que Sendin ye mesmo ua tierra amportante i ten muita stória i muito anteresse turístico.
I inda nun screbi subre las pessonas, las cousas que tenemos para comer, ls animales i las plantas.
Estes currales éran un largo cun casas a toda la ruoda e tenien solo ua antrada.
L curral onde stá l poço
Habie an Sendin bários currales cun un poço i un forno comunitairos, l que todo andica que serien de la mesma familha.
Nalguns habie ua tenerie, que era onde se curtien las pielhes, i l’auga era amportante . An Sendin habie mais que ua tenerie.
Noutros l poço era para sacar áuga para las pessonas i animales i anton tenien ajunto de l poço uas grandes pilas para l animales bubéren.
L curral de Maguel, nas scalabadas
Cul tiempo alguns destes currales passórun a tener salida i hoije yá mais parécen rues. Mas inda se puode ber bien cumo éran. Ye l que se passa cun l que queda na rue 1º. de Maio, para ls lados de l Baiunco.
Ls currales, por l que you pude ber, fui un modo de las pessonas iren fazendo la poboaçon a modos que pequeinhos pobos que se íban ajuntando uns als outros.
L curral de l Baiunco
Habie muitos mais, l que inda hoije se puode ber, mas l melhor ye precurá-los.
Dai ua buolta por Sendin i ides ber que ye anteressante.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
