Onte fui die de aprobacion de cuontas de dues de las mais importantes associaçones de Sendin, la de ls Bumbeiros i la Copratiba.
Las assamblés fazírun-se ne l salon de ls Bumbeiros i cumo hai buonas relaciones antre las dues antidades, las assamblés fúrun ua a seguir a la outra.
La giente fui-se ajuntando
Cumo la maiorie de ls sócios de ls Bumbeiros son tamien de la Copratiba fui fácele fazer l control de ls sócios.
Las dues antidades dórun ua liçon de cumo se debe trabalhar para l bien de la buona cumbibencia i deixórun ls que nun éran sócios partecipar, mas sien dreito a boto, cumo ye de lei.
Ls sócios de ls bumbeiros a ber las cuontas
Las cuontas fúrun destribuidas antes. La purmeira assamblé a fazer-se fui la de ls Bumbeiros i apuis de las splicaçones i de se ber que se habie feito un buono trabalho, fúrun aprobadas por ounanemidade.
La mesa de la Assamblé de ls Bumbeiros
Quando ampeçou la Assamblé de la Copratiba l salon staba cheno. Muita giente que nun partecipa nestas cousas, mas cuida saber falar deilhas diz que naida faç caso de las cousas, que la giente nun se amporta, mas la berdade ye que quando se bei trabalho nun fáltan.
L giente que partecipou nas assamblés
L Copratiba tamien dou todas las splicaçones neçairas i las cuontas fúrun tamien aprobadas por ounanemidade.
Las dues anstituiçones tubírun lucros finales de mais de 25 000 euros.
La mesa de la assamblé de la Copratiba
Tanto nua direçon cumo noutra, hai giente de outras tierras que tamien trabalhórun cun ls sendineses. A todos ls que fázen parte de ls ourganos diretibos ls nuossos parabienes.
Este testo stá screbido cun l- an ampeço de palabra, a la moda de l mirandés de Sendin, cunsante la 1ª. Adenda a la Cumbençon Ourtográfica de la Lhéngua Mirandesa.
