L die 23, falei de la casa i mostrei alguas casas antigas. Hoije bou a mostrar-bos trés retratos de cumo éran feitas alguas casas antigamente i la arte de la costrucion.
Yá nun hai dúbidas de que l termo de Sendin ten muitos sítios que mos dízen, que hai milhentos anhos que ye habitado.
Mas la poboaçon que hoije ten l nome de Sendin, deberie tener-se formado ne l tiempo de ls romanos, quando estes reunírun ls pequeinhos poblados, para melhor ls cuntrolar i outelizar la giente para trabalhar para eilhes.
Ua de las melhores probas ye la nuossa léngua, que ten la sue ourige ne l latin (léngua que falában ls romanos).
Mais alguas palabras cun ls zeinhos
Cumo bos habie dito, ende teneis mais uas palabricas para daprendéren ls que nun sáben l mirandês.
Mas cumo bos dezie al percípio, bou a falar de ls retratos que bou a poner.
Hai muitas rezones para nun se ber muita cousa antiga an Sendin, mas eiqui habie tamien casas amportantes.
Mirai para esta queluna
Esta queluna pertenecie a ua casa antiga i mais tarde quedou an drento de outra costruçon, que al sborralhar-se, la deixou a la mostra.
Cumo podeis ber tenie suporte para dous andares.
La queluna bista de outro lado
Cumo esta hai mais i que inda se puoden ber, ua na rue de la Armita , outra na rue de la Fráuga i outra ne l Baiunco.
Que tenerie acuntecido an Sendin para tanta cousa se haber çtruído?
Sabíedes que Sendin tubo eiluminaçon pública a gaç?
Esta ye outra queluna antre dues casas
Muito se fala na Anquesiçon i an judius, serie amportante saber la berdade de l que se passou, mas nó para tornar a traer l ódio i la rábia que fizo morrer tantos sendineses, mas para se daprender a respeitar todo mundo.
Este testo stá screbido cun l- an ampeço de palabra, a la moda de l mirandés de Sendin, cunsante la 1ª. Adenda a la Cumbençon Ourtográfica de la Lhéngua Mirandesa.
