Muitas bezes la stória anda ligada a la mitologie i por esso, para se fazer la stória de ua tierra, las cúntas subre las figuras mitológicas dessa tierra puoden ajudar a çcubrir muito de la sue stória.
Fui por cousa de la cúnta de la moura ancantada i de la fuonte de l pingo, que hai mais de 25 anhos stubimos alhá. You, Chico Mateus, Izeda i Mapril. Ende teneis l retrato.
L retrato ye ajunto a la fuonte de l pingo
Todo se stá a fazer para limpar la fuonte i fazer un camino até alhá. La Junta parece que bai ajudar i la Câmara tamien.
Chama-se la fuonte de l pingo porque la auga sale de ua fraga i al caer sinte-se pingar.
Mas nun fui solo la fuonte de l pingo que bimos, tamien, Mal Lugar i San Paulo.
Esta ye ua pintura an Mal Lugar
Cumo onte bos habie dito, ye muito antiga la presencia de l home ne l termo de Sendin i muitas cousas se ancontran por todo l lado. Alguas yá tenerien sido mudadas de sitio i torna-se defícele saber l local cierto de ls poblados, mas hai que ir studando todo.
Este ye outro retrato bien curioso
Parece la piedra de ua spultura pré-romana. Muitas outras zaparcírun cumo las que se ancuntrórun junto a la eigreija onde fui l semitério. Inda hai quien se lembre de haber bisto alguas spulturas an piedra i cun la forma de un cuorpo scabada na piedra.
Este testo stá screbido cun l- an ampeço de palabra, a la moda de l mirandés de Sendin, cunsante la 1ª. Adenda a la Cumbençon Ourtográfica de la Lhéngua Mirandesa.
