Fui hoije la presentacion de l libro “ Lua Nova” de l scritor “ José Alves ” na FNAC ne l Porto.
Cumo l scritor andubo a la scola an Sendin, onde passou ls purmeiros anhos de la sue bida i inda por riba, quien iba a fazer la presentacion era Amadeu Ferreira, mal serie se l Hoije nun stubisse presente.
Staba muita giente i Amadeu Ferreira fizo ua presentacion que mereciu las palmas de todos.
La giente que staba presente
Apuis de la presentacion falou l scritor que agradeciu la presencia de todos i nun squeciu ls bielhos amigos, nin la léngua que cumo el dixo, yá nun la falará mui bien, mas se stubir meia hora ne l planalto, eilha l sonará ne ls sous oubidos cumo ua cousa familiar, porque la ten guardada zde pequeinho.
L eiditor, l scritor i l presentador
Gustei de oubir Amadeu Ferreira i tamien l scritor porque eilhi staba la alma sendinesa. Quie nun queda cuntento quando bei ls sous bien?
Apuis houbo un Porto de Honra e dou para la giente falar i rebibir l passado.
L cumbíbio
Ye assi que you beio la cumbibencia i l trabalho de l Hoije , mostrar l que tenemos de buono i saber dar balor als nuossos, porque tenemos mesmo balor i giente amportante an todos ls setores de la sociadade. L Hoije inda ten muito mais que mostrar.
Ne l fin, l scritor screbiu ua dedicatória ne ls libros de ls que stubírun a la presentacion.
You tamien tube dedicatória
Este testo stá screbido cun l- an ampeço de palabra, a la moda de l mirandés de Sendin, cunsante la 1ª. Adenda a la Cumbençon Ourtográfica de la Lhéngua Mirandesa.
