L G.D. de Sendin, hoije, tubo un die para squecer. Fui a jogar a Bomioso i perdiu por 5-0.
La purmeira parte stubo eiquelibrada i l Bomioso marcou un golo, mas nada deixaba pensar l que iba a acuntecer. L Sendin fui para l anterbalo a pensar que na segunda parte cunseguirie mudar l resultado.
L Sendin jogaba de eigual para eigual
Ampeçou la segunda parte i durante l purmeiro quarto de hora l Sendin parcie capaç de ampatar, mas nua jogada mais feliç, l Bomioso fizo l 2-0. A partir deste golo l Sendin, cumo que fui apanhado por um mal. Parcie que las fuorças se tenien ido cumo que por ancanto i ls jogadores de l Sendin desourientórun-se.
La jogada de l golo de l Bomioso
L Bomioso parcie cuntagiado por l mal de l Sendin i até als 80 minutos l jogo mais parcie un jogo de solteiros i casados. Mas ua pequeinha antrequidencia fizo altarar ls animos, mas nada de malo se passou, l que fizo fui animar ls jogadores de l Bomioso, que ampeçórun a correr mais, anquanto ls de Sendin cada beç menos i ls golos aparcírun cun naturalidade.
L Bomioso era la única eiquipa an campo
I ne ls minutos finales l Bomioso marcou mais 3. Quando l jogo acabou yá nin se sabie se l Sendin inda staba an campo. Un die malo todos ténen, mas este fui malo de mais.
L público portou-se bien i l árbito tamien.
Para la stória:
Bomioso – 5
Sendin - 0
Este testo stá screbido cun l- an ampeço de palabra, a la moda de l mirandés de Sendin, cunsante la 1ª. Adenda a la Cumbençon Ourtográfica de la Lhéngua Mirandesa.
