La nuossa copratiba presentou hoije dous binos de alta culidade. Un bino tinto que ganhou ua medalha de prata i un bino branco que ganhou ua medalha de bronze, ne l cuncurso de toda la region de Trás ls Montes i an que cuncurrírun mais de 40 binos de bárias copratibas i produtores. La nuossa Copratiba ganhou 4 medalhas de prata i dues de bronze.
La einóloga a mostrar ls binos
Ls dous binos son ls purmeiros binos reserba de la region i cun Denominaçon de Ourige Cuntrolada ( DOC ). Cada beç mais ls binos de la nuossa tierra son coincidos i cunsiderados de alta culidade. L presidente fizo la presentacion i a seguir, la einóloga fizo ua splicaçon subre ls binos, las culidades i las caratelisticas de ls dous binos.
Ls cumbidados a scuitar la presentacion
La einóloga a dar la splicaçon
Stubírun las outoridades regionales; l persidente de la Câmara i bareadores, l repersentante de l Turismo, l persidente de la CVRTM, l persidente de l IEFP, ls representantes de la Direçon Regional de la Agricultura, ls respunsábles de la Biticultura de l Norte, presidentes de las Juntas de Freguesie alredor de Sendin, la Cunfrarie de Einófilos i Gastronomos de Trás ls Montes, cumpradores de bino i bários organos de la Comunicaçon Social.
Ls repersentantes de la Comunicaçon Social
La proba de binos fui ua surpresa para todos, an special la de l bino branco, yá que l tinto era yá un bino que ben ne l seguimento de outros buns binos de la Copratiba. L branco fui ua surpresa, porque fui por todos recincido cumo de ls melhores que habien bebido an toda la bida.
Ls cunfrades a probar l branco
Até l persidente parecie ademirado
Ye cun einiciatibas destas que se bai balorizando la nuossa tierra i muito mais hai inda para fazer se quejirmos cuntinar a ser melhores.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
