Hoije muita giente me preguntaba qual era l bino que habie sido premiado i presentado onte, porque lírun ou oubírun dezir na rádio i ne l jornal ou na anternete. Ye siempre defícele fazer algua cousa que nun traiga çcuçon, mas esso ye buno porque faç cun que las pessonas fálen i assi, mais debrebe se sáben las cousas.
La garrafa de bino tinto
Nestas presentaciones, ampéça-se por las fazer als meios de comunicaçon i als cumpradores, para se dáren a coincer. Ls sócios poderán siempre que quejíren, ir a la sue Copratiba a saber l que ténen. Mas cumo hai sócios i sendineses que stan loinje i me pedírun para mostrar melhor las garrafas, fiç esta ambora para esso.
La garrafa de bino branco
Estas son de bino DOC –reserba- i cumo podeis ber ténen la medalha ne l rótulo. Mas ls outros binos VQPRD i Regionales que fúrun premiados, tamien ténen las medalhas ne ls rótulos, solo que son binos que yá stában a ser bendidos antes, mas cun rótulos normales.
Yá stamos tamien an pormoçon ne ls “Intermarchés”.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
