L Festibal Antrecéltico ye ua manfestaçon de música cun raízes célticas i ten traído acá ls percipales grupos de l mundo que tócan essas músicas. Cumo l Praino ye un de ls sítios ne l mundo, onde la musica ten muito a ber cun essas raízes, este Festibal caiu acá, cumo l peixe n’auga. La gaita i la fraita pastoril son strumientos própios para essa música.
La familha Fernandes i Mário Correia
Onte a las 16h de la tarde, la familha Fernandes dou un cuncerto comentado i fui anteressante oubir a Henrique gueiteiro falar de toda la stória de la sue familha, que yá bai na 5ª. geraçon, siempre cun tocadores de gaita.
La giente que stube ne l cuncerto
L mais bielho a tocar i a la dreita, la mais nuoba que yá toca tamien
A las 18h fui la houmenage a tiu Bergíldo Cristal i falou tamien l sou filho, que hoije ye un de ls melhores tocadores de fraita i bombo al miesmo tiempo. Falou de la stória de ls strumientos que tiu Bergíldo fazie i de la sue arte, l porsor de musica mirandesa, Abílho Topa.
L filho de tiu Bergíldo, na mesa ye l de la camisa branca
Abílho Topa a falar
A la nuite fui mais un cuncerto cun trés bandas de musica ligadas a la musica folk i celta. La purmeira fui la banda de la Hungie, la KEREKES BAND, que cun la sue musica folk yá algo modernizada, nun animou muito la giente, mas fui ua buona antrada para ampeçar la nuite.
Kerekes Band
Un sfregante de la atuaçon
Seguiu-se la banda de la Ucraina, la VOANERGES, que tócan ua mistura de musica folk, rock i outras, mas you nun sou mui antendido nestas cousas, mas por l que oubi era ua banda cun ua musica algo çfrente de la musica celta, mas que tenie alguas raízes. La coreografie fui bien cunseguida.
La VOANERGES a tocar
Un retrato de la giente a oubir la banda
Para acabar fui la atuaçon de la banda SHOOGLENIFTY de la Scócia, esta si ua banda cun musica mais folk i que animou la giente. Fui un buono spetáclo para acabar la nuite i ampeçar la madrugada, yá que la banda tocou inda mais tiempo i era yá tarde quando acabou.
La banda SHOOGLENIFTY
Un retrato lindo desta banda
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
