Bós yá sabeis que l HOIJE anda siempre atento a todo l que se passa i onte, quando íbamos you i Cecílio a porparar uns retratos para fazer un roteiro de Sendin, al chegar al Sagrado, bi un tiu a porparar-se para tirar retratos a la eigreija i cumo ne l die atrás, bi passar l Menistro ne l Festibal, quando tocában ls Pica Tomilho, lougo se m’apareciu a el.
L Menistro a mirar para la eigreija
Nun stube cun meias medidas i fui a tener cul. Lougo aparciu Carlos Bandarra i apuis de ls cumprimentos dixe-le que l habie tirado un retrato i que iba a poner ne l HOIJE , l jornal de la anternete mais coincido (por nós), riu-se i Carlos pediu-le para tirar un retrato a ber-se la eigreija. You pensei que era melhor alhi mesmo cun las pessonas que alhi habie, lougo cuncordou i cumprimentou a todos i anquanto falaba tirei-le outro retrato.
L menisro a tirar un retrato a la nuossa eigreija
Gustei de l home, porque staba cun la giente cumo se fusse un de nós. Yá sabeis que you quando tengo que dezir algo, tanto faç ser menistro cumo nó, mas este debe ser ua buona pessona i séria porque staba ne l Sagrado a falar sin mostrar ares de amportante i até mos cumbidou a tomar un café. Ne l retrato stában a rir por cousa de la figueira que naciu ne l campanairo.
L Menistro a mirar para la figueira
Sendin ye mesmo un sitio buono para se benir a passar uns dies. I las pessonas quédan cuntentas de acá beníren i nós tamien gustamos de recebir bien a todos. Yá stou a oubir alguns a dezir:
- I que ye que truxo l menistro.
A esses you respondo:
- l que todos debien traer, buona cara i alegrie i esso el truxo i para mi baliu mais que todo.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
