Onte a la nuite i para ancerrar l Festibal Antrecéltico de Sendin, tocórun ls Pica Tomilho, la banda agrícola mais coincida de Pertual i que fizo la apersentacion de un nuobo CD. Fui l ancerrar cun chabe de ouro.
La banda Pica Tomilho
L sitio de l Festibal staba cheno i l antusiasmo de la giente fui grande. Eimilio ancantou la giente cun las sues lhonas na sendinés i la musica de la banda fui un berdadeiro spetáculo de modos a deixar a todos cun ganas de nuobo Festibal.
Un momiento de l spetáculo
A la tarde fui l Festibal de Folclore i stubírun cinco ranchos que dórun un festibal de musica FOLK de bários sítios de Pertual:
1 - L rancho anfantil de Sendin que yá ye coincido an todo lado i ye siempre bin recebido por todos.
2 – L rancho de Fermentões de Guimarães que ye un de ls melhores ranchos de l Minho, cun las sues danças, l bira, la chula i ls trajes chenos de quelor i ouro.
3 – Las pouliteiricas de Miranda, un grupo de pouliteiricas de ls 6 als 10 anhos i cun ls gueiteiros tamien de pouco mais eidade. Sendin recebiu-las cun ua grande alegrie i carinho.
4 – L rancho de Fortios de Portalegre que cun las modas alentejanas i ls usos i questumes de l Alto Alenteijo, muito animórun l Festibal.
5 – Para acabar, ls pouliteiros de Sendin, que cun la Comisson de Fiestas de Santa Bárbara, ourganizórun l Festibal i que dançórun ls palos cumo solo eilhes sáben.
Sendin ye mesmo ua tierra d’ancanto, mas para manhana tengo ua ambora que mais ua beç bos bai a mostrar que l HOIJE stá siempre persente para bos dar las nuobas i que Sendin nun ye tan squecido cumo se pensa.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
