Un de ls melhores adbertimientos que traírun ls mordomos de la fiesta de Santa Bárbela fúrun ls ansuflables. Poucas bezes la giente se lembra de ls garotos i até de ls moços i moças quando se faç ua fiesta, a nun ser para íren de anjos nas perciones. Eilhes tamien percísan de bibir la fiesta.
La antrada de la Abenida de l Ciclo
La casa de ls garotos
Onte a la tarde i a la nuite i hoije zde las 16h30 até la meia nuite, hai ls adbertimientos ne ls ansuflables para ls mais nuobos. You fui a ber i quedei cun buntade de ir tamien a adbertir-me ne ls ansuflables de todas las culidades. Habie alguns que dában para ls mais bielhos i mesmo ls maiores tamien fúrun a sprumentar.
L tapete de luta
Ls balancés
Nun ademira que ls maiores fússen a sprumentar alguns, porque nun ye todos ls dies que se ténen estas cousas de grácia. Mas mesmo a pagar ye ralo ber-se por qui. Fui buona la eideia de ls mardomos i talbeç faga cun que alguien se lembre de fazer ua cousa destas para mais dies de l anho.
L touro brabo
L sitio de la scalada
Este ultimo fui l que ls mais pequeinhos gustórun mais, porque an drento tenie muita bariadade de cousas para fazer.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
