D’atrás las fiestas éran ne l Demingo i a la nuite fazie-se l arreial, mas cul tiempo ampeçou-se a fazer arreial tamien ne l Sábado i hoije an die, yá quaisque nun se puode dezir que hai arreial, puis todos ls dies de la sumana hai cantadories ou arreial cun cunjuntos. La música ye que solo ben ne l Demingo de fiesta.
A la nuite junto als bumbeiros
Onte fui nuite de cantadorie i stubo buona, cun l cantor yá algo antradote, Jorge Ferreira, mas fizo ua buona atuaçon i de que toda la giente gustou. Traiu musicas de que ls mais bielhos yá tenien saludades i outras agradábles de oubir.
La rue de Camino Prado a la nuite caras al Sagrado
Caras a las placas
Quando todo acabou i benie para casa, lembrou-se-me de tirar uns retratos a la eiluminaçon, quedórun un pouco tremidos, mas dan bien para ber cumo las rues stan bien eiluminadas. Este anho punírun tamien eiluminaçon an quaije todas las rues, pul menos nas antradas l que fui tamien ua buona eideia.
La Abenida de l Ciclo
A la fiesta de Sendin bem muita giente de ls alredores i inda me quedei un rato a falar cun alguns, cumbidei-los a casa, mas yá nun quejírun, mas dou para saber que cuntinan a dezir que la fiesta de Sendin ye la maior de l Praino, mas que solo ls sendineses son capazes de fazer ua cousa assi.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
