L die de la fiesta ye hoije i ye la berdadeira fiesta an honra de Santa Bárbela. La fiesta religiosa que ten la missa an honra de Santa Bárbela i la percion, que fui ua cousa ampressionante, éran miles de pessonas a acumpanhar a Santa Bárbela. Cada beç mais giente ben a Sendin ne l die de la fiesta.
De ls bumbeiros al Sagrado nun se cabie
Outra bista de la giente
A la frente de la percion íban ls cabalhos todos angalanados i a acumpanhar a Santa Bárbela, iban Nuossa Senhora del Rosairo i Sagrado Coraçon de Jasus. La giente era un mar, miles de pessonas a mostrar a Santa Bárbela que Sendin cuntina a cunfiar neilha.
La frente de la percion
Nuossa Senhora de l Rosáiro
Sagrado Coraçon de Jasus
Dues bandas de musica acumpanhában la percion, la de Miranda i la de Bomioso, que por la purmeira beç bino a Sendin. La giente recebiu-los cun sastifaçon. Se hai algua tierra que seia bairrista, ye Sendin, mas contra l que alguns pénsan, tamien ye de las que mais apoia la giente de l Praino. Se alguien tenie dúbidas, era mirar cumo la giente recebiu las dues bandas.
La banda de Miranda
Santa Bárbela
Por la manhana houbo l peditório i la banda de Bomioso passou por la mie puorta i cumo ls mardomos soubírun recoincer l trabalho de l HOIJE , por todo l que fizo por la fiesta durante todo l anho i por fazer cun que cada beç mais sendineses quérgan benir, mandórun parar la banda para tocar alhi. La houmenage fui para todos quantos ledes l HOIJE.
La banda de Bomioso
Al fin de la tarde las bandas tocórun para la giente, ne l Sagrado até a la antrega de la fiesta, que fui tamien mui aperciada por miles de pessonas, mas manhana yá podeis ber cumo fui.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
