L Grupo Çportibo ourganizou un torneio de FUTSAL antre-rues de Sendin i furmórun-se 8 (uito) eiquipas. L torneio durou três dies. A la tarde i a la nuite de ls últimos trés dies, l campo de FUTSAL de l Grupo Çportibo fui un sitio de cumbíbio de la mocidade. Mais de 200 moços i moças partecipórun nua atibidade çportiba. Stan de parabienes l Grupo Çportibo i la nuossa mocidade.
Un momiento de l jogo para l terceiro i quarto lugar
Ls árbitos tamien fúrun cuntestados
L jogo de la final
Houbo muita animaçon i fui lindo ber ls moços a cumbibir. L torneio fui un de ls melhores de l Praino i fui l mais amportante porque ajuntou uito eiquipas, mas de Sendin. Solo Sendin faç ua cousa destas. Fázen-se muitos torneios, mas cun eiquipas de bárias tierras ou ampresas i cun ajudas de bárias antidades, mas este ye un torneio de ls moços de Sendin.
La giente a ber
La rue de l Canzielho cun la taça
Un garotico de uito anhos de la rue, cun la taça i la sue eiquipa
Ye assi que l nuosso Grupo Çportibo cuntribui tamien para la pormoçon del çporto. La Câmara ten apoiado l nuosso Grupo Çportibo, mas este ten sabido outilizar la ajuda, pormobendo atibidades i fazendo partecipar ls moços i moças, que cumo ne l fin deste torneio, cumbibírun cun alegrie i onte nun faltou l pernil i pan caseiros, mesmo alhi ne l campo. Quaije todos bebien sumo i auga, mesmo nesso, son eisemplo ls nuosssos moços.
L Persidente a antregar la taça
La eiquipa que ganhou l torneio, cun la taça
A comer pernil, persunto i pan caseiros
L campo ye de l Grupo Çportibo i ten stado al serbício de las scuolas i de las Associaçones i mesmo de la fiesta de Santa Bárbela, que ye alhi que faç ua de las sues maiores receitas. Durante todo l anho, ls moços ténen outilizado las anstalaçones.
Sendin yá merecie un monitor de la Câmara.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
