La Junta de Freguesie anda a abrir ua rue zde las eiras de l cemaque até l camino de Ruolos. Ye ua rue amportante, yá que bai a tirar l mobimiento de la rue de l Camino de las Binhas, para quien quejir ir para Mondin ou para las Scalabadas i l Baiunco, zde la capielha de San Sebastian.
Un portielho na rue de San Sebastian
Cumo la rue inda nun stá apersentáble, resolbi deixar ls retratos para outro die i mostrar-los apuis, quando la rue yá steia mais ou menos cumo bai a quedar. Mas tenie que bos dar la nuoba i para cumpletar la reportage tirei uns retratos a cousas que bi i que tamien bos ban a fazer lembrar ls tiempos d’atrás.
Ls animals ne l lameiro
L portielho ye de l anho de 1916 cumo se puode ber na piedra de riba. Ls lameiros d’atrás stában siempre chenos de bacas i mulas porque éran ls animals que ajudában la giente, mas hoije inda alhá stában dues mulas i ua burra.
Ua mula i la burra quedórun a mirar para l retrato
Até ls animals yá sáben que hai l HOIJE i tamien quíeren quedar bien ne l retrato. Ls mais bielhos inda bos lembrais bien de andar por lhi a páixaros i a guardar las mulas. L niu de la ciguonha inda alhi stá, cumo bos mostrei quando criórun. Nun le tirei l retrato, mas tirei-lo a un heilicóptro.
L heilicóptro
Nun quedou mui bien, mas tamien staba mui loinje.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
