Sendin nun ye ua tierra muorta cumo alguns pénsan i ne l die a die, la bida bai-se bibindo cumo ne ls outros sítios i nun falta onde trabalhar. Nun será onde cada un quererie, mas bai siempre habendo trabalho, bonda que se querga trabalhar. I quien nun arranja amprego cria l sou.
Ua casa onde se bénden flores
Yá se púoden cumprar flores naturales todos ls dies, an Sendin. Outra de las atibidades que tamien hai ye la de cabeleireira, hoije mostro ua i noutro die mostrarei mais, puis Sendin yá ye ua tierra onde las mulhres gústan de andar bien arranjadas. Hoije mostrei esta, porque al lado hai un laboratório de análises.
L laboratório i la cabeleireira
Outra atibidade ye la labandarie, que stá cun todo eigual ou melhor que las que you conheço, ne l Porto. Yá fui alhá bárias bezes i sei que ten muita giente que yá la outeliza. Cumo bedes, son trés cousas que fazien falta i que fúrun criadas por mulheres. Ls sendineses i las sendinesas cuntinan a mostrar l sou sprito de trabalhadores i ampresários.
La labandarie
La maquinarie que ten
Muito mais hai para mostrar i que faç cun que Sendin seia ua bila, onde yá se puode bibir bien.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
