Hai ua cousa que ten que se fazer para l zambolbimiento de l turismo de la nuossa region i que ye l studo de todas las formas de ber las fragas de las arribas, onde tenemos ua riqueza mui grande. Quando se oube falar tanto de la cabeça de la bielha de la sierra de la streilha i de l dous de Miranda i de tantas outras cousas por esse mundo afuora, porque nun habemos de falar de l que las nuossas arribas ténen i que ye tan ou mais amportante?
L guarda de las arribas
Quantos de bós yá stubistes acerca deste sitio i nunca bos destes cunta?
Miu armano Fernando dou cunta desta figura i dezi a ber se nun ye amponente? Pus ye la cabeça de l guarda de las arribas , alhi stá mirando para l riu i bin alto, para que naide s’astreba a fazer mal a las arribas. Nuite i die, alhi stá de guardian.
La cabeça, agora mais acerca
Todos ls que tirais retratos, d’hoije por lantre teneis la oubrigaçon de achar outras figuras nas fragas de las arribas i quiero ber se çcubris la águila, ua queluobra, ua tartaruga, solo para falar nas que you sei. La máscara yá bos la mostrei, hoije pongo un menir caído i ua fraga bulhideira. Tratai de achar outras para fazermos un álbum cun todas.
La fraga bulhideira
L menir caído
Para ls que nun sáben, menir – ye un menumiento pré-stórico, ua piedra grande, al alto, an honra de la fertelidade.
Las arribas son tan bielhas que até las fragas bán criando angúrrias cumo las manos de ls bielhos i la cara de las ties que passórun trabalhando neilhas, dies i dies sin çcanso.
Ua fraga angurriada
Ls buracos de ls mouros
Gustarie de bos screbir un lhibro cun todas estas cousas, mas se furdes guardando l HOIJE tenereis muito mais que un lhibro, tenereis cachicos de la nuossa stória, que bálen mais que mil libros, porque ne l HOIJE bai quedando un cachico de todo l termo i de toda la giente de Sendin.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
