Al screbir hoije subre l Naso, fágo-lo porque stube onte alhá i tamien porque era ua nuoba que bos querie traer un die destes.
L Naso ye la última de las grandes fiestas de l Praino, para nun dezir que ye la maior. Mas que ye de las mais amportantes, ye de certeza.
Nuossa Senhora de l Naso
Ne l die antes, hai feira i bai giente de todo l Praino, zde Bomioso a Mogadouro, para nun falar de todas las aldés de l nuosso cunceilho. La feira cumo ye ne l fin de las colheitas, ye siempre ua feira mui amportante i onde la giente bai a cumprar ls outensilios para la agricultura i roupa para l anho.
La feira
L Naso ye un lugar de ls mais religiosos de la Tierra de Miranda i onde la fiesta religiosa ye l mais amportante. La capielha ye mui bonita i antiga i ten un suolo de piedra cun zeinhos mui bien feitos i mui antigos, bale la pena ir a ber-los. Ne l largo ten bárias capielhas i ua scultura de un guerreiro celta.
La capielha
L suolo de la capielha
D’atrás era ua fiesta onde se iba, para alhá de ir a la missa i a la precion, se iba tamien a comer la merenda cun la familha i a ber ls foguetes de lágrimas, que éran un spetáclo de ls mais lindos de todas las fiestas. Mas para quien nun lebaba la merenda, nun faltaba por lhi, la puosta de bitela.
L guerreiro
Hoije las pessonas yá ancóntran alhá muito de comer, porque ban muitos mardomos de outras fiestas, cun comes i bebes para ganháren para las sues fiestas. Ye ne l Naso que ls mardomos de la fiesta de Santa Bárbara, de Sendin, fázen muito de l que percisan para fazer la nuossa fiesta. Por esso, ne l die 8 de Setembre ide al Naso a comer la puosta al barraco de ls mardomos de Santa Bárbara.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
