Fui onte la fiesta de San Bortelameu, an Argoselo i cumo ye questume, hai siempre sendineses nas fiestas mais amportantes i cumo siempre houbo ua cierta ligaçon antre la giente de Argoselo i de Sendin, nas dues tierras habie muito judiu i alguns de la mesma familha, fazie cun que fusse siempre giente a la fiesta de San Bortelameu.
San Bortelameu
D’atrás, ne l sitio de la capielha de San Bertalomeu fazie-se tamien feira i zde garoto que oubie falar nas stórias de la fiesta. Dezien que era ralo ber-se ua mosca alhá, l que era de grande ademiraçon por ser l tiempo deilhas. Tamien dezien que era l patrono de ls peleiros i de ls sapateiros, por esso era la maior fiesta de Argoselo, tierra de peleiros.
L sitio de la fiesta
Outra stória que cuntában era que San Bertalomeu era canhoto i por esso era tamien l patrono de ls canhotos. Nun bou a cuntar eiqui la stória de San Bertalomeu, mas ye amportante dar hoije esta nuoba, porque Sendin ten tamien ua grande tradiçon de trabalhar las pieles i esso si l bou a cuntar un die destes.
L andor de San Bertalomeu
D’atrás l andor iba cheno de notas, que era l fruito de las smolas que dában para pagar las pormessas. Cumo ls peleiros andában de tierra na tierra i passában muito peligro, fazien muita pormessa a San Betalomeu. Era ua de las maiores romaries del çtrito.
Nun bos squéçades de ir sembrando las nabiças, que stamos ne l tiempo.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
