Sendin passou l tiempo de ua aldé rural i bai passando als poucos a ua bila, cun ua bida que se puode cunsiderar urbana. Las casas modernizan-se, ls serbícios son cada beç mais i la giente bai tenendo l sou amprego. Tamien muitas de las pessonas trabálhan fuora e ban i bénen, rezon porque muitas bezes cuidamos que yá nun hai giente.
Un centro de stética dentária
Será que las pessonas que ban abrindo estas casas, l fázen por tenéren muito denheiro, ou por mos agradar? Fázen-lo porque sáben que Sendin ye ua tierra cun potencialidades para tener esses serbícios. Era buono que ls que se laméntan todos ls dies, fazíssen algua cousa nuoba por Sendin ou pul menos, nun andássen siempre a botar abaixo l que tenemos.
Ua ótica
Mostrei-bos l outro die ua cabeleireira, hoije mostro-bos mais dues, sendo que ua ye mesmo un anstituto de beleza, onde bénen pessonas de las tierras alredor de Sendin. Ls bielhos sotos son hoije berdadeiros mini-mercados modernos onde hai de todo. Para mostrar todo tenie que andar un més solo a falar nesto, mas als poucos bou ponendo todo porque todos ls dies hai nuobas para cuntar.
La guapa
L anstituto de beleza
Muito mais hai para mostrar que l modo de bida, an Sendin yá ye buono i puode ancuntrar-se de todo. Hai muita giente de fuora a recuperar casas para bibir acá i muitos eimigrantes se ban quedando por qui. Tamien ls que bibien nas cidades stan a tornar i a porparar las sues casas.
Un mini-mercado onde hai de todo
Quando oubo falar que yá nun se trabalha na agricultura i que todo bai acabando, dá-me la risa. Hai mais huortas ne l pobo, que habie d’atras por l termo todo. Junto a las casas hai muita tierra cultibada, onde nun falta nada. La bida demudou, muitos ye que téiman an nun se dar cunta.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
