Fui ne l Naso l purmeiro ancuontro de bloggers de l Praino. Yá se habie tentado fazer un an Fuonte Aldé, mas nun fui possible. Neste, stubírun repersentantes de 20 blogs, por l que you me dei cunta. I yá quedou mais ua de fazer l de Cunstantin. Para nós ye ua alegrie, porque esta, andou a la scuola an Sendin.
Ls bloggers iban-se ajuntando
Para ls que ándan tan preacupados cun la léngua, se ye mirandés, se ye sendinés, se se scribe ou fala a la moda de uns ou outros, l que quedou bin a la bista, fui que la léngua ye toda ua i yá ye ua léngua ouficial, de Pertual i chama-se mirandés, l que nada ampide que se fale cun la pernuncia de cada tierra.
Un brinde a todos
Para muitos tamien parece ser un porblema fazer-se siempre un almuorço, mas hai algun acuntecimento amportante sin se fazer la boda?
Mata-se l cochino, faç-se un batizado ou un casamento i ne l fin come-se i bebe-se. Até na segada, na trilha i na bendimia. Por esso l almuorço tenie que se fazer i sendo no Naso, nada melhor que la puosta i bino de la region.
L lume onde se assou la chicha
Acabado l almuorço ajuntemos-mos an baixo dun freixo, que éran percisos dous homes para l abraçar i fizo-se ua palhestra subre l mirandés. Amadeu dou-mos alguas nuobas, que un die destes yá las ireis a saber, mas que son mui amportantes, subre decumentos scritos de l sieclo XIX.
Amadeu a fazer la palhestra
La giente que staba a scuitar
Apuis inda se jogou la reilha, mas la maiorie tratou de se dar a coincer i falar nas bárias spriencias subre la léngua.
Habie muitos que yá muito que nun se bien, mas que andórun a studar juntos. Baliu la pena i quedou demostrado que sendineses i raianos ou de l mirandés central, todos se antendien mui bien i quieren trabalhar an cunjunto, para l bien de la nuossa léngua.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
