La tenerie era l sitio onde se curtien las pieles i cumo Sendin fui ua tierra que tenie muito ganado i tamien porque benírun para cá, alguns judius de ls que se refugiórun an Pertual, aquando de la sue spulson de Castielha, estes cumo nun éran duonhos de tierras, tratában mais de trabalhar ne ls ouficios i ne l comércio.
Un de ls sítios onde habie ua tenerie
Na tenerie faziesse un de ls trabalhos mais amportantes para curtir las pieles, mas cumo bos dixe onte, bou a splicar todo l trabalho para curtir las pieles, zde l percípio al fin. Mas para antenderdes melhor bou purmeiro mostrando ls sítios i ls nomes de las bárias partes de l curtimento de las pieles.
Onde inda stá l poço de ua tenerie
Na tenerie habie siempre un poço, porque fazie falta auga i esses poços éran fondos, de mais de siete metros i todos tenien alredor uas piedras bien arranjadas i de modo a eibitar que ls garotos císsen alhá. Hoije nun ténen tanto cuidado. Junto als poços habie pilas de piedra, mui grandes onde se ponien las pielas cun auga i cal.
La casa de turismo rural que ten l nome de tenerie
Als poucos ban lebando las piedras para anfeitar casas, an beç de perserbar ls locales tal qual stában i que série un chamadeiro para ls turistas.
You sei que hai quien pense que sabe i até quien saba mesmo todas estas cousas, mas deixai que todo mundo d’aprenda la stória de Sendin,
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
