Que an Sendin habie pul menos ua tafona desso nun tengo you qualquiera dúbida i esto porque quando era garoto, fui cun mie mai a bender un huorto de Abílio Golpe, que le chamában l huorto de la tafona. Onte fui alhá a ber l que habie por lhi i falei cun la mulher que l cumprou.
Ls huortos de la tafona
Falemos subre esso todo i dixo-me que la casa onde habie la tafona passou a ser un lagar de bino i inda iba a ber se se lhembraba para onde l home, que yá se morriu, habie lebado las piedras.
La casa onde era la tafona
La tafona era cumo un lagar antigo de l azeite, ne l modo de moler l cemaque. Molien ls fruitos de las cemaqueiras i habie quien l misturasse mesmo ls renuobos de las cemaqueiras, para fazéren ua massa melhor. Essa massa era para curtir la pieles, mas esso bou a splicar todo noutro die, mais tarde, zde l percípio al fin.
L cemaque
La azeituna era molida nun lagar, cun dues piedras puxadas por ua burra ou baca. Para moler l cemaque era eigual, mas solo tenie ua piedra para smagalhar l cemaque.
Sendin inda tubo tafonas manuales, an que la giente molie pequeinhas cuntidades para curtir pieles para casa, mas era ua curtimenta mais borreira.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
