La marcha stá a tornar-se an Sendin, un çporto. Son yá muitos ls homes i las mulheres que todos ls dies i percipalmente a la nuite ban por las rues a fazr un pouco de marcha, porque ye ua atibidade que faç bien a la salude. I yá ye agradáble dar un passeio por las rues porque yá hai siempre cousas para ber cumo yá dixe.
La farmácia
L pormetido ye debido i tengo que ir ponendo, de beç an quando, todas las cousas que inda nun mostrei. Esto para, ls que stan fuora hai muitos anhos, sabéren l que yá tenemos i para muitos de ls que acá stan, se íren dando melhor de cunta, que Sendin nun parou.
Ua botique que débeis besitar
You gusto de ir a dar tamien un passeio i de aperciar l que tenemos por todas las rues i mirai que hai muita cousa que muitos nun conhécen, porque Sendin yá ye tan grande, que hai giente que passa anhos sien passar por ciertas rues. Ide a dar un passeio a las nuites que bale bien la pena.
Ua sposiçon de carros
Mas nin solo las casas comerciales son para se ber, porque yá hai muitos sitios lindos que a la nuite débeis ir a ber. Tirei un retrato a la fuonte de Camino Prado i ye ua cousa que debemos aperciar i sentar-mos un rato a oubir la auga a correr. Faç bien a la salude.
La fuone
Stou mesmo a oubir un a dezir:
-Se tubíssemos tiempo cumo el.
Todos teneis tiempo i para la salude débeis arranjar-lo siempre.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
