Este ye un chamadeiro que ten muito a ber cun ua de las atibidades que se fazien, an Sendin i já hai muitos i muitos anhos. Nada melhor que ls chamadeiros i muitos nomes de la giente i de las cousas, outilizados na tradiçon oural para se coincer melhor la stória de ua tierra.
L sitio de ls pelames
Hai muitos storiadores i até studiosos de las cousas que se preacúpan cun ls decumentos que hai por ende, scritos muitas bezes sin se saber cun que fundamento. I anton pássan la bida a falar ne l fulano tal i nel sicrano tal, que screbírun i que dezírun muita cousa i que para eilhes ye ua scritura sagrada, mas quien melhor que nós sabe de la nuossa bida?
Hoije yá solo hai ua huorta
Muitas serán berdade i debemos pensar bien neilhas, mas nun podemos squecir l que mos deixou la giente bielha, ls nomes, ls termos i até ls ditos i las cuontas.
La léngua fui passando de pais para filhos i ye la melhor stória que tenemos, por isso ye tan amportante saber l sendinés i l mirandês.
Onde alagában las pieles para las amolecer
Al falar hoije de ls pelames ye para saberdes que esses nomes que bos bou mostrando nestes últimos dies, son nomes de sítios, que cumo podeis ber, serbíen oara atibidades ligadas a la curtimenta de las pieles. Todos esses sítios quédan para l mesmo lado de Sendin. Yá bos irei a falar de l curtimento de las pieles.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
