Fui hoije la antrega de las medalhas de ls melhores binos de Trás ls Montes, an Balpaços i onde stubírun ls repersentantes de l setor de l bino de toda la region de l Norte de Pertual. Muitos fúrun ls binos que cuncorrírun i fui cun alegrie que la Copratiba de Sendin recebiu 6 medalhas de seis binos que fúrun premiados.
Domingos Domingues a recebir la medalha de l reserba branco
Antregórun las medalhas ls persidentes de las câmaras de Balpaços, Macedo, i Miranda que fui repersentada por l bereador sendinés porsor Carção. Tamien antregórun medalhas l repersentante de la Direçon Regional de Agricultura i l Gobernador Cebil de Bila Real.
L persidente de la Copratiba a recebir la medalha de l reserba tinto
Quando por todo l lado se pensa ne l feturo i na culidade de ls pordutos, porqui ban aparecendo ls porfetas de la zgrácia. Toda la giente sabe que ténen que se arrancar ciertas binhas que yá nun dan para l trabalho i ciertas pessonas yá nun puoden trabalhar, mas inda hai muito a fazer para l feturo.
Ne l fin houbo la proba de todos ls binos premiados
Para ls que bótan yá ls foguetes a pensar ne l fin de Sendin i de la Copratiba, ye melhor que ban pensando ne l sou feturo. Nunca naide ganha cun l mal de ls outros.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
