Todos ls dies hai nuobas para cuntar i las de hoije son de ls acuntecimentos que houbo, mas a que you nun puode ir. An Morais jogou l Sendin l sou purmeiro jogo de treino antes de ampeçar l campeonato. L Morais stubo na 3ª. debison, ne l anho passado i quier tornar a ganhar l Çtrital, mas la nuossa eiquipa fui alhá ampatar 1-1.
G.D.Sendin
Ne l Naso ampeçórun las fiestas i ne l die 6 ye feira i la Associçon de ls burros fizo ua mostra de todos ls animales que ténen ne l Palancar i fazírun un çfile cun ls burros aparelhados i albardados, para ls mais nuobos podéren ir d’acabalho.
L cartaç de la feira de l Naso
Un burro albardado
Ne l die siete ye la gincana de burros an Azinhoso, onde tamien se faç ua feira mui grande i aonde ban muito moço i moça que bénen de bários países. Hai un cuncurso i ne l fin hai bitela assada para toda la giente. Manhana si irei para tirar mais retratos i mostrar todo.
L cartaç de la feira de Azinhoso
Mostrei-bos estes cartazes i dei las nuobas destas atibidades, porque son de ua Associaçon que ten la sede an Sendin i que tanto faç por l turismo de la nuossa region.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
