La nuossa region fui muito amportante ne l tiempo de ls romanos por bárias rezones. La maior parte de l que se ten screbido nun fala de muita cousa i squece quaije siempre l percipal, que ye la tradiçon oural i ls chamadeiros. Ten sido Amadeu Ferreira, l que mais ten trabalhado nestas dues partes.
Las carbas
L HOIJE para alhá de las amboras de todos ls dies, tambien bai dando alguas que son amportantes para la nuossa stória i para que la giente saba mais.
L nome carbas ye un chamadeiro de Atanor i ten la sue rezon de ser, porque nesse sitio habie minas de carbon de piedra.
Ua piedra de carbon, nas carbas
Mirai bien la quelor de la tierra
Ne l tiempo de ls romanos éran sploradas minas a cielo abierto, porque nesse tiempo l minério achaba-se por muito lado, sien percisar de scabar. L nuosso camino mourisco, nun era mais que ua strada romana, mui outilizada para por eilha lebar l minério i para las tropas romanas podéren andar cun mais facelidade, para porteger las minas i ls pobos.
Resto de un forno
Andaba por estes sítios, porque ancuntrei nun libro la nuoba de que an Atanor, ne l anho de 1882 i 1886, Henrique de Moraes Carvalho tenie registrado dues minas de carbon de piedra, ne l sitio de las Carvas. I Augusto César Madeira habie registrado ua mina ne l sitio de la Espreitadeira, tamien an Atanor, ne l anho de 1886. Estas minas inda starien abiertas, an 1906.
Un filon de carbon
Ne l percípio de l séclo XX tamien an Sendin habie ua fábrica de rolhas i ua destilarie, mas desso bos falarei.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
