Ye fazendo cousas que la bida sigue sien parar, caminando caras al anfenito. Cada beç que bou a algun lado, beio l trabalho de ls sendineses, que cumo formigas, todos ls dies ban fazendo carreirones por onde pássan. Tamien hai las cigarras que nada mais fázen que cantar, mas poucos las cunsíguen ber, mas eilhas quédan felizes cul sou cantar i nós oubimos música sien pagar.
La rue de las eiras de l Cemaque para ls Pelames
Ye abrindo rues i fazendo casas que Sendin crece i se zambuolbe, fui l que acunteciu cun l alargamento de l Camino de l Pilo, que fizo cun que alhi se fusse zambuolbendo ua nuoba zona de pequeinhas ampresas. Tamien esta rue irá a fazer zambuolber la nuoba zona por donde passa. Que la Câmara ajude cumo fizo na outra, que la porparou bien.
I yá bai ampeçando a parecer ua rue al sério
Puode parecer para alguns que pouco ou nada bai adelantrar, ou pouca giente bai a serbir, mas ye amportante, yá que bai a facelitar l transito para todo l lado Poente de Sendin i bai a tornar mais fácele l acesso al riu. Por Camino de las Binhas mal passa un camion. Felizes ls que béien i nun ándan ciegos a la spera de porjetos de que solo eilhes sáben.
La rue bista de outro modo
Se mirarmos bien para l sitio adonde bai a passar, bemos la tierra de ls alhales, que ye de la Junta ou de la Fabriqueira i bai a balorizá-la muito, facelitando bários porjetos de cunstruçion.
You siempre gustei de ls chamadeiros de toda la bida i por esso quando era persidente de la Junta, deixei a las rues l chamadeiro de toda la bida, cumo la mie. Esta deberie chamar-se rue de ls Alhales que ye un nome que faç parte de la nuossa stória.
Toda la zona ye onde mais chamadeiros ténen a ber cun ls sendineses:
Eiras de l Cemaque, Pelames, Alhales, Camino de las Binhas...
E ste testo stá screbido cun l- an ampeç o de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
