Sendin ye ua tierra cun tanta giente i tan amportante que ls sendineses stan por todo l lado i partecípan an muitas atibidades, quier comerciales quier culturales. Nunca ye de mais dezir esto para ber se ciertas pessonas deixan de mirar solo para l sou umbelhigo. La AEPGA fui la animadora de la feira.
Ls burros prontos para la gincana
Fazírun ua gincana de burros cun bários cuncurrentes de muitos paízes. Habie franceses, spanholes i destes habie muito galhego que benírun de apeto a la feira, japoneses, eitalianos, oulandeses i de muitos outros sítios. You falei cun alguns i gustórun de que le falasse tamien an mirandês.
Onde se ajuntában para las anscriçones
La giente que staba a ber
La gincana era ua proba angraçada cun bárias cousas para fazer d’acabalho ne l burro i houbo stranjeiros que fazírun buonas probas. Ua francesa quedou ne ls purmeiros lugares de l cuncurso. Nun stube a ber quien ganhou, porque l mais amportante era l cumbibio i la animaçon de toda la giente.
L sitio de la gincana
La francesa a fazer la proba
Mais ua beç tengo que falar ne l turismo i muito mais quando solo se fázen las cuntas politicas i nó las berdadeiras cuntas de l que repersenta l trabalho de muita giente. Para alhá de ls stranjeiros que benírun, habie giente de todos ls pobos alredor, hai que pensar tamien ne l turismo de la nuossa giente que nun puode ir para outros cuntinentes i tamien, an saber traer ls filhos de ls nuossos eimigrantes.
Este si ye un spetáclo cultural i cun giente
L comer, debaixo de toldos bien arranjados i cun mesas i bancos, sin moscas i cun bun bino i chicha de la melhor, assada a la nuossa bista, batadas cozidas i melon i balancie por 5 euros, solo fui possible porque l pobo i ls boluntairos ajudórun para que nada fazisse falta. Mas ls moços i moças de la Associaçon comírun debaixo de ua árbole, sentados ne l suolo, fazendo ua grande ruodra.
Nun faltában sendineses
Ls moços i moças
You nun ambento nada, mostro l que hai i nesta feira habie muito sendinés, a bender facas i bino, a bender artesanato, a partecipar cun la AEPGA i a comer.
Ne l mesmo die ne l Naso habie muitos mais, por esso yá ye tiempo de deixarmos de fazer causo de ls que solo se sáben agabar a eilhes.
Solo por ber estes garoticos tan cuntentos
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa
