Quando se óuben falar an turismo certas pessonas, a las bezes dá-me la risa, porque ou nun sáben l que ye turismo ou bíben nun mundo çcoincido. Todo l que faç las pessonas andar de un lado para l’outro, nin siempre ye turismo, mas quando se sabe aporbeitar esso para se desambuolber ua region ou ganhar denheiro ou se faç desso ua atibidade, anton stá-se a fazer turismo.
Este ye un campo de bóbedas
Se soubírmos fazer deste lindo postal un modo de fazer cun que giente tenga la curjidade de ber cousas assi i de poder caminar por sitios destes, stamos a fazer turismo. L turismo bibe de quien mostra, de quien bai a ber ou a bibir, de quien ganha cun esso i de quien faç ou mantén cousas assi.
Bisto de outro lado
Quantos gustarien de poder ber esto tal qual you l bi? I se a este postal ajuntarmos mais dieç ou binte i al mesmo tiempo le arranjarmos mais uas atibidades culturales i gastronómicas ou uns dies de paç i alegrie? Nun teneremos turistas?
Ua huorta an pie de casa
Yá mais de ua beç que falei nesto, mas nun era ua atibidade que muitos gustarien de fazer nin que fusse solo por uns dies? Até a bós bos dá gusto ber, mesmo ne l retrato…
Para ls que se stan a rir i a pensar que son cousas sien amportancia, quedai a saber que serie un modo de traer mais giente que maginais.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
