La scuola yá bai a ampeçar i ls porsores porpáran l nuobo anho scolar. Ne l Ciclo todos andában an reuniones i an porparatibos para que todo steia pronto para recebir ls alunos. Sendin ye un centro scolar i debe de ser mais apoiado por la giente de Sendin i por las anstituiçones locales. Tenemos que saber atrair ls alunos de las aldés al nuosso alredor.
L Ciclo
Outra de las nuossas anstituiçones i que debe de ser tamien mais apoiada ye la Copratiba, que hoije tubo ls sous diretores reunidos. La politica de la UE, bino a traer bários porblemas als agricultores, mas la Copratiba bai i stá yá a resolber muitos. Ua nuoba que cunseguimos saber ye que la bindímia yá stá a ser porparada i para la zona de baixo de Sendin, la campanha ampeça ne l die 26.
La Copratiba
Ye amportante l passado i la stória de Sendin, mas tenemos que bibir l persente i para esso bemos las cousas a andar de l melhor modo. Todos ls dies bos bou mostrando la einobaçon, que an Sendin se bai fazendo an todos ls setores de la bida. L HOIJE fala de todo, para alguns de menos i para outros de mais, mas ye l HOIJE que milhares de pessonas, an todo l mundo gustan de ler.
Las nuobas bombas de gasolina
A la nuite fui a dar un passeio i tirei este retrato, que cuido que ye mais un eisemplo de que se trabalha. Esta ye la çfrencia antre ls que fázen i ls que pássan la bida a dezir l que se habie de fazer.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
