Ne l Sabado i hoije, l Persidente de la Republica passou por Sendin i cumo son çfrentes ls tiempos, las motibaçones ou las cundiçones. Cabaco Silba cumo purmeiro menistro passou eiqui i fui a besitar la Copratiba. Era you de la direçon i an riba de un cuntentor de las ubas, cun ua colcha a serbir de strado, falou a la giente de Sendin.
L persidente a la chegada a Miranda
Tamien l Persidente de la República, Ramalho Eanes, era you persidente de la Junta de Freguesie i tamien tubo que scuitar l persidente de Sendin i tamien, an riba de un cuntentor, mas cun ua manta de farrapos a tapar, falou para melhares de pessonas, mesmo contra la buntade de la Câmara i de ls bereadores, mesmo de l de Sendin, daqueilhe tiempo.
L persidente a ser recebido por la Câmara de Miranda
Tamien l Persidente de la República, Mário Soares, era you persidente de la Assamblé Municipal, bino almuorçar al Ciclo i besitou Sendin. Nin sei para que stou a falar nestas cousas, mas mesmo agora fui l HOIJE que fui a fazer cun que la besita de Cabaco Silba, nun passasse an claro para Sendin. Ye que cumo podeis ber, se nun fui possible benir a Sendin, ls sendineses stubírun alhá i a repersentar bien la nuossa tierra.
A la dreita de Cabaco Silba dous sendineses
L Bereador Carçon, mandatário ne l cunceilho por la candidatura de Cabaco Silba i l Gobernador Cebil, dous sendineses que muito ténen feito por Sendin, inda que haba quien tente dezir outra cousa, stubírun persentes i an lugares de honra.
L Persidente tamien tubo tiempo de atender ls mais nuobos
L HOIJE stá siempre ne ls lugares onde ye perciso Sendin tener ls uolhos. Quando se fala an ligar ls dous parques anternacionales i hai giente que stá mais anteressada an çfender ls sous anteresses ou las sues eideias, tengo que chamar a la atençon que todo se faç para Sendin quedar para trás. Ye de Fermoselle que se fala, ye de puontes que se ban a fazer i nós abanamos l cartaç de capital de las arribas.
Sendin ten que ser la capital porque ye l pobo maior i mais eiboluido de ls que pégan cun l douro anternacional. La puonte a fazer-se, ten que ser onde acurtie mais l camino para las grandes cidades deste i de l’outro lado i onde seia mais fácele de fazer i sien andar a arressaios para chegar a la puonte. Esse sito queda antre Freixenosa i Sendin, cun l Picon de ls Arteiros ou l Picon de l Diabo, cumo de ls melhores.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
