Manhana faç um anho que saliu la purmeira nuoba de l HOIJE i onte a las 23h 33m 18s recebiu la besita nº. 80 000. Hoije i manhana inda irá recebir mais de 600, l que quier dezir que num anho recebiu mais besitas que giente transportou l barco de Miranda. L barco recebiu un prémio i bien merecido, por l que fizo por l turismo, l HOIJE dá hoije un prémio als sendineses que gústan tanto de la sue tierra, al puonto de colaboráren tanto cun l sou HOIJE.
Sendin
L HOIJE passou a ser bisto an todos ls cuntinentes l que mostra que Sendin ye tan grande cumo l mundo, porque an todo lado hai un cachico de Sendin, cumo bos bou a mostrar. Ne ls Stados Ounidos hai sendineses i alhá ténen un cachico de tierra ou de casa, ye ua parte de Sendin. Stubo alhá, hai pouco tiempo, Chico Mateus de besita als sous familhiares, fui un de ls purmeiros alunos que you tube.
Chico Mateus ne ls Stados Ounidos
Ne l Brasil hai muito sendinés que todos ls dies ban a ber l HOIJE i mándan mensages a pedir cousas i scríben a la familhia para you poner mais cousas. Branco ye un desses que nunca deixa de ber. Ne l Canadá Fernando Penino i Aniceto, tamien dous de ls mius purmeiros alunos na scuola, ténen huorta, casa i jardin.
Branco
Aniceto i Fernando
La parte de trás de la casa de Fernando
Na oustrália stá outro de ls mius purmeiros alunos, Abílio Mafra, onde ten un huorto bien pimpon. An Francia, outro de ls mius purmeiros alunos, Antonho Fernandes, tén tamien casa i huorto i Paxarreiro, que muito ten colaborado cun l HOIJE . Ye un ourgulho para mi cumo sendinés i cumo porsor, ber que l porsor nun l tapou ls uolhos, mas fizo deilhes homes de por todo lado por onde ánden, nun se perdéren i zambuolbéren ls sítios para donde fúren.
Abílio Mafra
L huorto de Abilio Mafra
Paxareiro
L retrato de paxareiro ye nas arribas i stá a mostrar al nieto ua de las nuossas marabilhas. Todos ls sendineses i sendinesas, que stán ne l stranjeiro, deberien fazer l mesmo als sous filhos i ansinar-le la nuossa léngua, para que Sendin seia cada beç mais coincido i amado.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
