A las bezes oubimos dezir que se bai acabando todo l que habie d’atrás cumo se la bida se fusse tornando mais defícele ou pior l modo de bibir. Todo acaba i todo bai demudando, mas la bida cuntina siempre, l modo de bibir ye que se bai demudando, mas nun se puode dezir que seia pior ou melhor, mas que ye çfrente.
Tiu Alfredo Poca a ampeçar uas botas
Todos nós tenemos suidades de l tiempo que yá bibimos, mesmo quando fui custoso, mesmo quando dezimos:
-Deixai-me de la bida d’atrás.
Porque no meio de muita cousa mala, tamien houbo muita cousa buona, lembrar tamien ye bibir . I ye esso que bou a fazer hoije, lembrar l tiempo an que l çapateiro fazie ls çapatos por medida.
A poner las biras
Muitos de bós dezis muitas bezes, que yá nun hai çapateiros cumo d’atrás, mas inda bai habendo siempre quien rejista i an Sendin, inda hai quien ponga uas capas, quien cumponga uns çapatos i até quien faga uns nuobos se fur perciso. Cumo andamos a fazer ua recuolha de las atibidades, fumos a fazer ua de cumo se fazien ls çapatos (uas botas).
A acabar las botas
Eiqui solo bos dou la nuoba, yá que la atibidade quedou recolhida an retratos i bideo, para la AZATS i para la Casa de la Música. Dou-bos tamien la nuoba que ban a cuntinar las palhestras i outras atibidades antre las dues antidades. L HOIJE cumo bedes, cuntina a star atento a todo i las amboras cuntínan.
Alguas ferramientas de l çapateiro
Manhana ben un grupo de 30 pessonas a besitar Sendin i l HOIJE sabe que la AZATS i la Casa de la Musica stan a colaborar, mas manhana yá bos darei las amboras.
E ste testo stá screbido cun l- an ampeço de palabra, a la moda de l mirandés de Sendin, cunsante la 1ª Adenda a la Cumbençon Ourtográfica de la Lhéngua Mirandesa.
